Wednesday, January 26, 2022

ਦੋ ਕੱਪ ਤੇ ਕੇਤਲੀ

 ਮੈਂ ਤੇਰੀ ਬਹੁਤ ਉਡੀਕ ਕਰਾਂਗੀ

ਤੇਰੇ ਨਾਲ, ਤੇਰੀ ਖੁਸ਼ਬੂ ਵਿੱਚ

ਮੇਰਾ ਸ਼ਿਮਲੇ ਜਾਣ ਵਾਲਾ ਸੁਪਨਾ 

ਅਜੇ ਅਧੂਰਾ ਹੈ..


ਮੇਰੇ ਖਰੀਦੇ ਦੋ ਕੱਪ

ਤੇ ਉਹਨਾਂ ਦੀ ਕੇਤਲੀ ਵੀ

ਤੇਰੀ ਉਡੀਕ ਵਿੱਚ ਹੈ

ਜੇ ਮੁੜ ਆਵੇਂ

ਤੇਰੇ ਨਾਲ ਹੱਸਾਂਗੀ ਓਦੋਂ 

ਤੇ ਵਿਛੋੜੇ ਦੀ ਗੱਲ ਦੱਬ ਦਿਆਂਗੀ


ਮੈਂ ਤੇਰੀ ਬਹੁਤ ਉਡੀਕ ਕਰਾਂਗੀ

ਤੇਰੇ ਧੋਖੇ ਨੂੰ

ਰਜਾਈ ਅੰਦਰ ਢੱਕਿਆ ਹੈ

ਬਾਹਰ ਮੂੰਹ ਕੱਢਦਾ ਤੇ

ਠੰਡਾ ਹੋ ਜਾਂਦਾ 

ਪਤਾ ਨਹੀਂ ਲੱਗਦਾ ਕਿਸੇ ਨੂੰ

ਕਿ ਕਿੰਨਾ ਸੇਕ ਹੈ 

ਛੱਲ ਫ਼ਰੇਬ ਦਾ


ਮੈਨੂੰ ਮੈਂ ਖੁੱਦ ਨੂੰ

ਬਹੁਤ ਪਿਆਰੀ ਲੱਗਦੀ ਹਾਂ 

ਪਰੀਆਂ ਵਰਗੀ, ਦਿਲ ਛੂਹਣ ਵਾਲੀ

ਪਿਆਰ ਕਰਨ ਵਾਲੀ

ਤੇਰਾ ਦਰਦ ਜ਼ਹਿਰ ਬਣੀ ਜਾ ਰਿਹਾ ਹੈ

ਤੇ ਹੁਣ ਜ਼ਹਿਰ ਨਾਲ ਘੁੱਲ ਰਹੀ ਹਾਂ 

ਰੋਜ਼ ਚੁੱਪ ਦੇ ਹਨ੍ਹੇਰੇ ਵਿੱਚੋਂ ਨਿਕਲ

ਹਰਫ਼ਾਂ ਦੀ ਰੌਸ਼ਨੀ ਵਿੱਚ ਬਹਿੰਦੀ ਹਾਂ 


ਮੈਂ ਤੇਰੀ ਬਹੁਤ ਉਡੀਕ ਕਰਾਂਗੀ 

ਸੋਚਾਂ ਦੇ ਹੜ੍ਹਾਂ ਨੂੰ 

ਬੰਨ੍ਹ ਜਿਹਾ ਲਾ ਕੇ ਬੈਠੀ ਹਾਂ 

ਤੇਰੇ ਵਿਛੋੜੇ ਦੀ ਮਸੀਤ ਵਿੱਚ

ਤੇਰੇ ਮੁੜ ਆਉਣ ਦੀ ਨਮਾਜ਼ ਪੜ੍ਹ ਰਹੀ ਹਾਂ 

ਮੇਰੀ ਮੁਹੱਬਤ ਅੱਗੇ

ਤੇਰੀ ਜੰਗ ਦੇ ਮੈਦਾਨ 

ਇੱਕ ਦਿਨ ਸ਼ਰਮਿੰਦੇ ਹੋਣਗੇ

ਤੇ ਤੇਰੀਆਂ ਨਫ਼ਰਤਾਂ 

ਆਪਣੇ ਆਪ ਨਾਲ ਨਫ਼ਰਤ ਕਰਨਗੀਆਂ 

ਕਿ ਅਸੀਂ ਕਿਸ ਨਾਲ ਨਫ਼ਰਤ ਕਰ ਬੈਠੇ?


ਕੱਪ, ਮੈਂ ਤੇ ਕੇਤਲੀ

ਤੇਰੀ ਉਡੀਕ ਵਿੱਚ 


- ਮਨਦੀਪ ਕੌਰ ਟਾਂਗਰਾ

Sunday, November 7, 2021

ਕੈਕਟਸ ਦੀ ਨੋਕ

 ਮੈਂ ਪੈਰਾਂ ਦੀਆਂ ਜ਼ੰਜੀਰਾਂ ਤੋੜ

ਅੱਜ ਮੁੜ ਤੋਂ ਸ਼ੁਰੂ ਹਾਂ 

ਮੇਰੇ ਸਫਰ ਵਿੱਚ ਤੂੰ ਨਹੀਂ 

ਤੇ ਤੇਰੇ ਸਫਰ ਵਿੱਚ ਹੁਣ ਮੈਂ ਨਹੀਂ 

ਤੇਰਾ ਆਪਣਾ ਆਕਾਸ਼ 

ਤੇ ਮੈਂ ਧਰਤੀ ਵਿੱਚੋਂ ਮੁੜ ਤੋਂ ਫੁੱਟ ਰਹੀ ਹਾਂ 


ਤੇਰੇ ਲਾਏ ਬਾਗ ਦਾ ਮੈਂ ਫੁੱਲ ਨਹੀਂ 

ਮੇਰੇ ਬਾਪ ਨੇ

ਭੱਖਦੇ ਚੱਟਾਨ ਤੇ ਉਗਾਇਆ ਹੈ ਮੈਨੂੰ 

ਕੰਡਿਆਂ ਵਿੱਚ ਖਿੜ੍ਹਿਆ ਗੁਲਾਬ ਨਹੀਂ ਮੈਂ 

ਕੈਕਟਸ ਦੀ ਨੋਕ ਤੇ ਖਿੜ੍ਹੀ ਕਲੀ ਹਾਂ 


ਨਫ਼ਰਤਾਂ ਦੀ ਕਿੱਥੇ ਹੱਕਦਾਰ ਮੈਂ ??

ਮੈਂ ਤਾਂ 

ਸਭ ਨੂੰ ਮੁਹੱਬਤ ਕਰਨ ਵਾਲੀ ਹਾਂ 

ਨਫ਼ਰਤਾਂ ਮੇਰੇ ਕਿਰਦਾਰ ਦੀ ਤੌਹੀਨ ਹੈ

ਮੈਂ ਤਾਂ 

ਸਭ ਨੂੰ ਮੁਹੱਬਤ ਕਰਨ ਵਾਲੀ ਹਾਂ 

ਨਫ਼ਰਤਾਂ ਹਨ ਕਿ ਸਾੜਾ, ਹੈ ਤੇ ਅਪਮਾਨ ਹੀ

ਮੈਂ ਤਾਂ 

ਸਭ ਨੂੰ ਮੁਹੱਬਤ ਕਰਨ ਵਾਲੀ ਹਾਂ 


ਚੱਲ ਅਲਵਿਦਾ ਹੁਣ ਮੁੜ ਨਹੀਂ ਵੇਖਾਂਗੇ 

100 ਪੂਰੇ ਹੋਏ

ਖਤਮ ਤੇ ਅਖੀਰ

ਮੈਂ ਮਰ ਕੇ ਜਿਊਣਾ ਹੈ..! 

ਸਵੇਰ ਹੋ ਰਹੀ ਹੈ..! 


#MandeepKaurSidhu

Saturday, October 16, 2021

ਦਰਗਾਹ ਵੀ ਅੰਦਰ ਹੈ।

 ਕਹਿੰਦੇ ਤੇਰੀ ਕਵਿਤਾ ਨੂੰ ਜਗ੍ਹਾ ਨਹੀਂ ਮਿਲੇਗੀ

ਕਿਸੇ ਵੀ ਦਰਗਾਹ ਵਿੱਚ ਪਨਾਹ ਨਹੀਂ ਮਿਲੇਗੀ


ਕੈਸੀ ਹੈ ਜੋ ਧੁੱਪ ਵਿੱਚ ਭਾਫ਼ ਬਣ ਮੁੱਕਦੀ

ਮੀਂਹਾਂ ਦੇ ਪਾਣੀਆਂ ਵਿੱਚ ਜਾ ਜਾ ਲੁੱਕਦੀ

ਦਿੱਸਦੀ ਨਹੀਂ ਜੋ

ਉਹ ਹੋ ਕਿਵੇਂ ਹੈ ਸਕਦੀ?

ਖਾਲ਼ੀ ਪੰਨਿਆਂ ਦੇ ਉਹਲੇ

ਕਿਹੜੇ ਅੱਖਰ ਸਾਂਭ ਸਾਂਭ ਰੱਖਦੀ?


ਅਮਰ ਹੈ ਕਵਿਤਾ

ਮੈਂ ਬੱਸ ਰੂਹਾਂ ਲਿੱਖਦੀ ਹਾਂ 

ਅੰਦਰ ਵੱਸਦੀ ਹਾਂ

ਕਿਤਾਬਾਂ ਵਿੱਚ ਨਹੀਂ ਮੈਂ ਵਿੱਕਦੀ ਹਾਂ 


ਕਹਿੰਦੇ ਤੇਰੀ ਕਵਿਤਾ ਨੂੰ ਜਗ੍ਹਾ ਨਹੀਂ ਮਿਲੇਗੀ

ਕਿਸੇ ਵੀ ਦਰਗਾਹ ਵਿੱਚ ਪਨਾਹ ਨਹੀਂ ਮਿਲੇਗੀ


ਮੇਰੀ ਕਵਿਤਾ ਦੀ ਜਗ੍ਹਾ ਮੇਰੇ ਅੰਦਰ ਹੈ

ਪਨਾਹ ਵੀ ਅੰਦਰ ਹੈ, ਤੇ ਦਰਗਾਹ ਵੀ ਅੰਦਰ ਹੈ। 


-ਮਨਦੀਪ

ਅਜੇ ਤੂੰ ਤੇ ਮੈਂ ਖਿੜ੍ਹੇ ਨਹੀਂ

ਅਜੇ ਤੂੰ ਤੇ ਮੈਂ ਖਿੜ੍ਹੇ ਨਹੀਂ ਹਾਂ 

ਮੇਰੇ ਤੇ ਜੋ ਓਸ ਦੀ ਬੂੰਦ ਬੂੰਦ ਹੈ

ਪਿਆਰ ਸੰਗ ਛਲਕ ਛਲਕ

ਤੇਰੇ ਤੇ ਡੁੱਲ ਰਹੀ ਹੈ

ਤੇ

ਅਜੇ ਤੂੰ ਤੇ ਮੈਂ ਖਿੜ੍ਹੇ ਨਹੀਂ 


ਰੰਗਾਂ ਦੇ ਵਿੱਚ ਤੂੰ ਵੀ

ਰੰਗਾਂ ਦੇ ਵਿੱਚ ਮੈਂ ਵੀ

ਡੋਡੀ ਮੈਂ, ਡੋਡੀ ਤੂੰ

ਭਰੇ ਪਏ ਪਿਆਰ ਨਾਲ ਨੱਕੋਂ ਨੱਕ

ਤੇ 

ਅਜੇ ਤੂੰ ਤੇ ਮੈਂ ਖਿੜ੍ਹੇ ਨਹੀਂ 


ਖਿੜ੍ਹ ਕੇ

ਤੂੰ ਵੀ ਫੁੱਲ ਹੋਵੇਂਗਾ ਤੇ ਮੈਂ ਵੀ ਫੁੱਲ ਹੋਵਾਂਗੀ

ਗੁਲਦਸਤਾ ਜਿਹਾ

ਪਿਆਰ ਦੀ ਮਹਿਕ ਦਾ ਗੁਲਿਸਤਾਨ ਹੋਵਾਂਗੇ

ਤੇ 

ਅਜੇ ਤੂੰ ਤੇ ਮੈਂ ਖਿੜ੍ਹੇ ਨਹੀਂ 


-ਮਨਦੀਪ



Tuesday, September 28, 2021

ਸਿਫਰ

 ਤੂੰ ਏਂ ਕਿ ਝੂਠ ਏਂ

ਕੋਈ ਫ਼ਰੇਬ ਜਿਹਾ

ਮਿੱਠਾ ਜ਼ਹਿਰ ਏਂ

ਅੱਖਾਂ ਚੋਂ ਨਿਕਲ ਰਿਹਾ

ਟਪ ਟਪ ਅੱਥਰੂ ਏਂ 


ਤਿੱਖਾ ਦਰਦ ਏਂ

ਪਿਆਰ ਨਹੀਂ ਏਂ ਤੂੰ

ਇਕਰਾਰ ਨਹੀਂ 

ਤਮਾਸ਼ਾ ਏਂ

ਮੁੱਕਿਆ ਖੋਖਲਾ 

ਬੇਰੰਗ ਏਂ ਤੂੰ


ਕੁੱਝ ਵੀ ਨਾ ਬਚਿਆ

ਉਹ ਏਂ ਤੂੰ

ਤੁਰਦੀ ਲਾਸ਼ ਦਾ 

ਜ਼ੁੰਮੇਵਾਰ ਏਂ ਤੂੰ

ਅਸਮਾ ਨਹੀਂ  ਏਂ

ਨਾ ਜ਼ਮੀਨ ਏਂ

ਕੁੱਝ ਵੀ ਨਹੀਂ 


ਕੁੱਝ ਵੀ ਨਹੀਂ 

ਸਿਫਰ ਵੀ ਨਹੀਂ 

ਫਿਕਰ ਵੀ ਨਹੀਂ 

ਅੰਤ ਹੁਣ, ਜ਼ਿਕਰ ਵੀ ਨਹੀਂ ਏਂ ਤੂੰ!  


#MandeepKaurSidhu

Monday, September 20, 2021

ਰੀਝਾਂ

 ਵਿਵਾਦਾਂ ਵਿੱਚ ਹੈ ਤੇਰੀ ਚੁੱਪ

ਤੇਰੀ ਸੋਚ ਦਾ, ਮੇਰੇ ਅੰਦਰ ਸ਼ੋਰ ਡਾਢਾ ਹੈ

ਤੇਰੀ ਹਿੰਮਤ ਤੇ ਤਰਸ ਆਉਂਦਾ ਹੈ

ਹਿੰਮਤਾਂ ਅਜਿਹੀਆਂ ਵੀ ਹੁੰਦੀਆਂ ਨੇ??


ਹਿੰਮਤ ਸਕਾਰਾਤਮਕ ਹੋਣੀ ਚਾਹੀਦੀ ਹੈ

“ਮੈਂ ਤੇਰੇ ਨਾਲ ਹਾਂ।”

ਨਕਾਰਾਤਮਕ ਨਹੀਂ

“ਤੇਰੀ ਹਿੰਮਤ ਕਿਵੇਂ ਪੈ ਗਈ?” 


ਨਵੀਂਆਂ ਕਰੂੰਬਲ਼ਾਂ

ਪਿਆਰ ਦਾ ਸੁਮੇਲ ਮੰਗਦੀਆਂ 

ਖਿਆਲ ਦਾ ਸੁਮੇਲ ਮੰਗਦੀਆਂ 

ਰੂਹਾਂ ਦਾ ਮੇਲ ਮੰਗਦੀਆਂ 


ਖੱਬੇ ਸੱਜੇ ਪੈਂਦੇ

ਨਦੀਆਂ ਵੱਗਦੀਆਂ 

ਸਿੱਧਾ ਉੱਪਰ ਛੱਤ ਵੱਲ

ਮੇਰੇ ਪਿਓ ਦੇ ਪਸੀਨੇ ਨਾਲ ਸਜਾਏ 

ਬਾਲ੍ਹੇ ਇੱਟਾਂ ਦਾ ਮਹਿਲ ਹੈ


ਤੇਰਾ ਮੇਰਾ ਅਜੇ ਤੱਕ ਕੋਈ ਮਹਿਲ ਨਹੀਂ 

ਖਿਆਲਾਂ ਵਿੱਚ ਵੀ ਨਹੀਂ 

ਹਰੇ ਦਿਸਦੇ ਨੇ ਸਭ ਨੂੰ ਤੇਰੇ ਲਾਏ ਬਾਗ

ਕੈਕਟਸ


ਸੁਨਹਿਰੀ ਗੁੰਝਲਦਾਰ ਪਰਾਲ਼ੀ ਦੇ ਸਿੱਟੇ 

ਰੀਝਾਂ ਦੀ ਕੁੱਲੀ ਦੀ ਆਸ ਵਿੱਚ 

ਰੋਜ਼ ਤੇਰੇ ਅੱਗੇ ਰੱਖਦੀ ਹਾਂ 

ਲੋੜ ਹੀ ਨਹੀਂ! ਕੀ ਲੋੜ ਹੈ? .. ਦੀ ਅੱਗ ਵਿੱਚ

ਝੁਲ਼ਸ ਰਹੇ ਨੇ! 


…. ਫਿਰ, ਮੈਂ ਰਾਣੀ ਕਿਸ ਦੀ ਹਾਂ ?


#MandeepKaurSidhu

Friday, September 11, 2020

ਤੂੰ ਮੇਰਾ ਨਹੀਂ...

 


ਤੂੰ ਮੇਰਾ ਨਹੀਂ 

ਹਵਾਵਾਂ ਦੀ ਰੀਸ ਨਾ ਕਰ 

ਮੇਰੀਆਂ ਜ਼ੁਲਫ਼ਾਂ ਦੇ ਵੱਲ 

ਤੇਰੀ ਅੱਖ ਦੇ ਹੇਰ ਫੇਰ 

ਮੈਨੂੰ ਪਸੰਦ ਨਹੀਂ...


ਤੂੰ ਮੇਰਾ ਨਹੀਂ 

ਜਗ੍ਹਾਵਾਂ ਦੀ ਰੀਸ ਨਾ ਕਰ 

ਮੇਰੇ ਦਿਲ ਦੇ ਵੱਲ 

ਤੇਰੀ ਅੱਖ ਦੇ ਹੇਰ ਫੇਰ 

ਮੈਨੂੰ ਪਸੰਦ ਨਹੀਂ...


ਤੂੰ ਮੇਰਾ ਨਹੀਂ 

ਸਜ਼ਾਵਾਂ ਦੀ ਰੀਸ ਨਾ ਕਰ 

ਮੇਰੀ ਤਨਹਾਈ ਦੇ ਵੱਲ 

ਤੇਰੀ ਅੱਖ ਦੇ ਹੇਰ ਫੇਰ 

ਮੈਨੂੰ ਪਸੰਦ ਨਹੀਂ...


ਤੂੰ ਮੇਰਾ ਨਹੀਂ...


Saturday, July 4, 2020

ਤੜਪ

ਤੜਪ ਬਹੁਤ ਹੈ
ਕੱਲੇ ਰਹਿਣ ਦੀ
ਤੜਪ ਬਹੁਤ ਹੈ
ਕੁੱਝ ਕਹਿਣ ਦੀ
ਤੜਪ ਬਹੁਤ ਹੈ
ਇਹਨਾਂ ਅੱਥਰੂਆਂ ਦੀ
ਤੜਪ ਬਹੁਤ ਆ
ਵਿਛੜੀਆਂ ਰੂਹਾਂ ਦੀ
ਤੜਪ ਬਹੁਤ ਹੈ
ਕੋਈ ਸੁਣ ਲਵੇ
ਤੜਪ ਬਹੁਤ ਹੈ
ਕੁੱਝ ਪਿਆਰਾ ਕਹੇ
ਤੜਪ ਬਹੁਤ ਹੈ
ਕੋਲ ਆਉਣ ਦੀ
ਤੜਪ ਬਹੁਤ ਹੈ
ਤੈਨੂੰ ਚਾਹੁਣ ਦੀ
ਤੜਪ ਬਹੁਤ ਹੈ
...................

Monday, January 13, 2020

ਰੰਗ ਸੂਹਾ ਲਾਲ...

ਪਹਿਲਾ ਰੰਗ ਤੇਰਾ ਮਾਣਿਆ
ਮੈਂ ਰੰਗ ਸੂਹਾ ਲਾਲ...
ਮੇਰੀਆਂ ਅੱਖਾਂ ਵਿੱਚ ਜਵਾਬ ਸਨ
ਤੇ ਤੇਰੇ ਦਿਲ ਵਿੱਚ ਉੱਠਦੇ ਸਵਾਲ...
ਤੇਰੇ ਚੇਹਰੇ ਦੀ ਮੁਸਕਰਾਹਟ
ਤੇ ਮੇਰੇ ਪਿਆਰ ਭਰੇ ਖਿਆਲ...
ਸ਼ਾਲਾ ! ਪਹਿਲਾ ਰੰਗ ਤੇਰਾ ਮਾਣਿਆ
ਮੈਂ ਰੰਗ ਸੂਹਾ ਲਾਲ...

ਦੂਜਾ ਰੰਗ ਤੇਰਾ ਮਾਣਿਆ
ਮੈਂ ਰੰਗ ਗੁਲਾਬੀ ਸੂਹਾ...
ਤੇਰੇ ਲਈ ਹੀ ਖੋਲਿਆ
ਮੈਂ ਦਿਲ ਆਪਣੇ ਦਾ ਬੂਹਾ...
ਤਪਦੀਆਂ ਤਿੱਖੀਆਂ ਧੁੱਪਾਂ
ਤੂੰ ਕੀਤੀਆਂ ਨਿੱਘੇ ਸਿਆਲ...
ਸ਼ਾਲਾ ! ਪਹਿਲਾ ਰੰਗ ਤੇਰਾ ਮਾਣਿਆ
ਮੈਂ ਰੰਗ ਸੂਹਾ ਲਾਲ...

ਤੀਜਾ ਰੰਗ ਤੇਰਾ ਮਾਣਿਆ
ਮੈਂ ਰੰਗ ਪੀਲਾ ਸੁਨਹਿਰੀ...
ਜਾ ਬਿਠਾਇਆ ਜਿਸਨੇ ਮੈਨੂੰ
ਪਿਆਰ ਦੀ ਕਚਹਿਰੀ...
ਤੇਰੇ ਇੱਕ ਇੱਕ ਲੜ ਨੇ ਲਿਆਂਦੇ
ਮੇਰੇ ਦਿਲ ਵਿੱਚ ਕਈ ਭੂਚਾਲ...
ਸ਼ਾਲਾ ! ਪਹਿਲਾ ਰੰਗ ਤੇਰਾ ਮਾਣਿਆ
ਮੈਂ ਰੰਗ ਸੂਹਾ ਲਾਲ...

ਚੌਥਾ ਰੰਗ ਮੈਂ ਮਾਣਿਆ
ਮੈਂ ਰੰਗ ਸੁਰਮੇ ਰੰਗਿਆ..
ਮੇਰੀਆਂ ਅੱਖਾਂ ਨੇ ਕਜਲਾ
ਜਿਵੇਂ ਹੋਵੇ ਇਹਦੇ ਤੋਂ ਹੀ ਮੰਗਿਆ...
ਤੇਰੇ ਤੇ ਵੇਖ ਅੱਜ
ਜਾ ਮੁੱਕੀ ਮੇਰੀ ਭਾਲ...
ਤੇਰੇ ਤੇ ਵੇਖ ਅੱਜ
ਜਾ ਮੁੱਕੀ ਮੇਰੀ ਭਾਲ...
ਸ਼ਾਲਾ ! ਪਹਿਲਾ ਰੰਗ ਤੇਰਾ ਮਾਣਿਆ
ਮੈਂ ਰੰਗ ਸੂਹਾ ਲਾਲ...


ਗੁਲਾਬ

ਤੇਰੇ ਦਿੱਤੇ ਸੂਹੇ ਗੁਲਾਬ ਨਾਲ
ਪਿਆਰ ਬਹੁਤ ਮੈਨੂੰ ਹੋ ਗਿਆ..
ਕੱਲ ਫੇਰ ਜਦ ਅੱਖ ਮੀਚੀ
ਮੇਰੀਆਂ ਬਾਹਾਂ ਵਿੱਚ ਆ ਸੋ ਗਿਆ..
ਮਹਿਕ ਸੰਭਲਦੀ ਨਹੀਂ ਸੀ ਉਸ ਕੋਲੋਂ
ਮੇਰੇ ਸਾਹਾਂ ਦਾ ਹੀ ਬਸ ਹੋ ਗਿਆ..
ਮੈਂ ਅਰਬਾਂ ਫੁੱਲਾਂ ਦੇ ਦੇਸ਼ ਰਹਿੰਦੀ ਹਾਂ
ਤੇਰਾ ਇੱਕੋ ਹੀ ਗੁਲਾਬ ਦਿਲ ਮੋਹ ਗਿਆ..
ਤੇਰੇ ਦਿੱਤੇ ਸੂਹੇ ਗੁਲਾਬ ਨਾਲ
ਪਿਆਰ ਬਹੁਤ ਮੈਨੂੰ ਹੋ ਗਿਆ..

Friday, September 14, 2018

ਜ਼ਮੀਰ

ਚੱਲ ਹੋਰ ਕਰਦੇ ਔਖੇ ਰਾਹ ਮੇਰੇ,
ਅਜੇ ਲੱਗਦਾ ਜਾਨ ਬਾਕੀ ਹੈ ਬਾਹਾਂ ਵਿੱਚ!
ਕੋਈ ਨਿਰਦਈ ਜਿਹੀ ਕਰ ਸ਼ਰਾਰਤ,
ਅਜੇ ਦੇਖ ਸਕਦੀ ਹਾਂ ਰਾਹਾਂ ਵਿੱਚ!
ਚੱਲ ਫੇਰ ਜ਼ਮੀਰ ਸੁੱਟ ਆਪਣਾ,
ਅਜੇ ਮਰੇ ਨਹੀਂ ਚਾਅ ਮੇਰੇ!
ਚੱਲ ਨਵੀਂ ਮੁਸੀਬਤ ਘੜ ਕੋਈ,
ਚੱਲੀ ਜਾਂਦੇ ਨੇ ਸਾਹ ਮੇਰੇ!
ਚੱਲ ਕਰ ਹੋਰ ਹਨ੍ਹੇਰਾ,
ਹਾਹਾ.... ਅਜੇ ਤਾਰੇ ਦੇਖ ਸਕਦੀ ਹਾਂ!
ਕੋਈ ਅੱਖਾਂ ਨੋਚਣ ਵਾਲਾ ਬਣਾ ਯੰਤਰ,
ਅਜੇ ਅੱਥਰੂ ਸਾਂਭ ਰੱਖਦੀ ਹਾਂ!
ਚੱਲ ਭੁੱਲ ਰੱਬ ਨੂੰ ਅੱਜ ਫੇਰ,
ਕਹਿ ਦੁਨੀਆਂ ਤੇਰੀ ਨਹੀਂ ਬਣਾਈ ਰੱਬਾ!
ਮੈਂ ਬਾਦਸ਼ਾਹ, ਤੂੰ ਤੇ ਲੋਕ ਗੁਲਾਮ ਮੇਰੇ,
ਤੇ ਮੇਰੀ ਸਵਰਗ ਵਿੱਚ ਜਗ੍ਹਾ ਬਣਾਈਂ ਰੱਬਾ!

Tuesday, July 10, 2018

ਕਵਿਤਾ

ਕਵਿਤਾ ਮੇਰੀ ਤੇਰੇ ਨਾਲ
ਰੋਜ਼ ਲੜਾਈ ਹੈ
ਤੇਰੇ ਨਾਲ ਚੁੱਪ ਰਹਾਂਗੀ
ਜਦ ਤੱਕ ਮੈਨੂੰ ਨਹੀਂ ਬੁਲਾਉਂਦੀ ਤੂੰ

ਕਵਿਤਾ ਮੇਰੀ ਤੇਰੇ ਨਾਲ
ਰੋਜ਼ ਲੜਾਈ ਹੈ
ਤੈਨੂੰ ਜਿੱਤਣ ਨਹੀਂ ਦੇਵਾਂਗੀ
ਜਦ ਤੱਕ ਮੈਨੂੰ ਨਹੀਂ ਜਿਤਾਉਂਦੀ ਤੂੰ

ਕਵਿਤਾ ਮੇਰੀ ਤੇਰੇ ਨਾਲ
ਰੋਜ਼ ਲੜਾਈ ਹੈ
ਤੇਰੀ ਨਬਜ਼ ਤੇ ਪੈਰ ਧਰਿਆ ਏ
ਜਦ ਤੱਕ ਮੇਰੇ ਵਾਂਗ ਨਹੀਂ ਕੁਰਲਾਉਂਦੀ ਤੂੰ

ਕਵਿਤਾ ਮੇਰੀ ਤੇਰੇ ਨਾਲ
ਰੋਜ਼ ਲੜਾਈ ਹੈ
ਤੈਨੂੰ ਸੌਣ ਨਹੀਂ ਦੇਵਾਂਗੀ
ਜਦ ਤੱਕ ਮੇਰੇ ਸੁਪਨੇ ਨਹੀਂ ਸਜਾਉਂਦੀ ਤੂੰ

ਕਵਿਤਾ ਮੇਰੀ ਤੇਰੇ ਨਾਲ
ਰੋਜ਼ ਲੜਾਈ ਹੈ
ਤੈਨੂੰ ਮੁੱਕਣ ਨਹੀਂ ਦੇਵਾਂਗੀ
ਜਦ ਤੱਕ ਮੇਰਾ ਦਰਦ ਨਹੀਂ ਰੁਕਾਉਂਦੀ ਤੂੰ

ਕਵਿਤਾ ਮੇਰੀ ਤੇਰੇ ਨਾਲ
ਰੋਜ਼ ਲੜਾਈ ਹੈ
ਤੈਨੂੰ ਹੱਸਣ ਨਹੀਂ ਦੇਵਾਂਗੀ
ਜਦ ਤੱਕ ਮੈਨੂੰ ਨਹੀਂ ਹਸਾਉਂਦੀ ਤੂੰ

ਕਵਿਤਾ ਮੇਰੀ ਤੇਰੇ ਨਾਲ
ਰੋਜ਼ ਲੜਾਈ ਹੈ
ਤੇਰਾ ਦਰਦ ਨਹੀਂ ਸੁਣਾਂਗੀ
ਜਦ ਤੱਕ ਮੇਰਾ ਦਰਦ ਨਹੀਂ ਵੰਡਾਉਂਦੀ ਤੂੰ

ਕਵਿਤਾ ਮੇਰੀ ਤੇਰੇ ਨਾਲ
ਰੋਜ਼ ਲੜਾਈ ਹੈ
ਤੈਨੂੰ ਸੁੱਕਣ ਨਹੀਂ ਦੇਵਾਂਗੀ
ਜਦ ਤੱਕ ਔੜ ਨਹੀਂ ਮੈਨੂੰ ਬਣਾਉਂਦੀ ਤੂੰ

ਕਵਿਤਾ ਮੇਰੀ ਤੇਰੇ ਨਾਲ
ਰੋਜ਼ ਲੜਾਈ ਹੈ
ਤੈਨੂੰ ਮਰਨ ਨਹੀਂ ਦੇਵਾਂਗੀ
ਜਦ ਤੱਕ ਮੈਨੂੰ ਮਾਰ ਨਹੀਂ ਮੁਕਾਉਂਦੀ ਤੂੰ



ਕਿਸਮਤ ਕਿੱਥੇ ਤੂੰ ਕਮਜ਼ੋਰ ਸੀ ?

ਕਿਸਮਤ ਕਿੱਥੇ ਤੂੰ ਕਮਜ਼ੋਰ ਸੀ ?
ਜਿੱਥੇ ਮੈਂ ਹੌਂਸਲੇ ਨਾਲ ਬੱਝੀ ਸੀ..
ਜਿੱਥੇ ਭਰ ਜੋਬਨ ਵਿਚ ਸੱਜੀ ਸੀ..
ਕਿਸਮਤ ਕਿੱਥੇ ਤੂੰ ਕਮਜ਼ੋਰ ਸੀ ?
ਜਿੱਥੇ ਮੈਂ ਸੁਪਨੇ ਬੁਣ ਰਹੀ ਸੀ..
ਸੋਹਣੇ ਪਲ ਪੁਣ ਰਹੀ ਸੀ..
ਕਿਸਮਤ ਕਿੱਥੇ ਤੂੰ ਕਮਜ਼ੋਰ ਸੀ ?
ਜਿੱਥੇ ਮਾਪਿਆਂ ਦਾ ਮੈਂ ਪੁੱਤ ਸੀ..
ਸੱਜਰੀ ਰੰਗੀਨ ਰੁੱਤ ਸੀ..
ਕਿਸਮਤ ਕਿੱਥੇ ਤੂੰ ਕਮਜ਼ੋਰ ਸੀ ?
ਜਿੱਥੇ ਵੰਡਦੀ ਨਾ ਮੈਂ ਥੱਕਦੀ ਸੀ..
ਸਹਿੰਦੀ ਨਾ ਕਦੇ ਅੱਕਦੀ ਸੀ..
ਕਿਸਮਤ ਕਿੱਥੇ ਤੂੰ ਕਮਜ਼ੋਰ ਸੀ ?
ਜਿੱਥੇ ਮੇਰੇ ਹਾਸਿਆਂ ਦਾ ਸ਼ੋਰ ਸੀ..
ਗ਼ਮਾਂ ਦਾ ਨਾ ਕੋਈ ਜ਼ੋਰ ਸੀ..
ਕਿਸਮਤ ਕਿੱਥੇ ਤੂੰ ਕਮਜ਼ੋਰ ਸੀ ?
ਜਿੱਥੇ ਲੁਕ ਲੁਕ ਦੁਆ ਕਰਦੀ ਸੀ..
ਹਰ ਤਾਹਨਾ ਹੱਸ ਕੇ ਜਰਦੀ ਸੀ..
ਕਿਸਮਤ ਕਿੱਥੇ ਤੂੰ ਕਮਜ਼ੋਰ ਸੀ ?
ਜਿੱਥੇ ਸਭ ਦਾ ਦੁੱਖ ਵੰਡਾਉਂਦੀ ਸੀ..
ਆਪਣਾ ਚੁੱਪ ਚਾਪ ਹੰਢਾਉਂਦੀ ਸੀ..
ਕਿਸਮਤ ਕਿੱਥੇ ਤੂੰ ਕਮਜ਼ੋਰ ਸੀ?
ਜਿੱਥੇ ਮੈਂ ਅੰਤ ਦਾ ਅੰਦਾਜ਼ਾ ਨਾ ਲਾਇਆ..
ਤੇਰੇ ਤੇ ਭਰੋਸਾ ਦਿਖਾਇਆ..

ਪੀੜਾਂ

ਚੀਰ ਚੀਰਿਆ ਗਿਆ ਹੈ 
ਪੀੜਾਂ ਨਾਲ ਛੱਲੀ ਹੋਈ ਹਾਂ 
ਕਹਿੰਦੇ ਸੀ ਮੁਸਕੁਰਾਹਟ ਸੋਹਣੀ ਹੈ ਤੇਰੀ 
ਹੁਣ ਦਰਦਾਂ ਦੀ ਮੱਲੀ ਹੋਈ ਹਾਂ 
ਹੱਸਦੀ ਭੀੜ ਆਸੇ ਪਾਸੇ 
ਰੋਂਦੀ ਕੱਲੀ ਹੋਈ ਹਾਂ

Monday, July 9, 2018

ਐਸਾ ਜਨਮ

ਐਸਾ ਜਨਮ ਕੀ ਕਰਨਾ ਰੱਬਾ ?
ਜਿੱਥੇ ਵੱਢੇ ਹੱਥ ਦੀਆਂ ਉਂਗਲਾਂ ਤੋੜਦੇ ਨੇ..
ਐਸਾ ਜਨਮ ਕੀ ਕਰਨਾ ਰੱਬਾ ?
ਜਿੱਥੇ ਤੋੜ ਤੋੜ ਤੰਦਾਂ ਪੀੜਾਂ ਨਾਲ ਜੋੜਦੇ ਨੇ..
ਐਸਾ ਜਨਮ ਕੀ ਕਰਨਾ ਰੱਬਾ ?
ਜਿੱਥੇ ਹਾਸੇ ਖਿੰਡਾ ਖਿੰਡਾ ਫੇਰ ਮੋੜਦੇ ਨੇ..
ਐਸਾ ਜਨਮ ਕੀ ਕਰਨਾ ਰੱਬਾ ?
ਜਿੱਥੇ ਚੁਣ ਚੁਣ ਚਾਅ ਪਰਾਂ ਸੁੱਟ ਰੋੜਦੇ ਨੇ..
ਐਸਾ ਜਨਮ ਕੀ ਕਰਨਾ ਰੱਬਾ ?
ਜਿੱਥੇ ਪੱਤੀਆਂ ਮਸਲ ਫੁੱਲ ਮਰੋੜਦੇ ਨੇ.. -ਮਨਦੀਪ 

Sunday, July 8, 2018

ਖ਼ਾਮੋਸ਼

ਅੱਥਰੂ ਕਿਰ ਜਾਂਦੇ ਨੇ ਮਾਂ 
ਜਦ ਜਦ ਹੱਸਦੀ ਹਾਂ..
ਫੇਰ ਢਿੱਲ ਪੈ ਜਾਂਦੀ ਹੈ ਖੁਸ਼ੀਆਂ ਨੂੰ 
ਜਦ ਜਦ ਕੱਸਦੀ ਹਾਂ..
ਆਵਾਜ਼ ਖ਼ਾਮੋਸ਼ ਨਿਕਲਦੀ ਹੈ 
ਜਦ ਜਦ ਦੱਸਦੀ ਹਾਂ..
ਜਦ ਵੀ ਸੌਣ ਦੀ ਕਰਾਂ ਕੋਸ਼ਿਸ਼
ਫੇਰ ਖਿਆਲਾਂ ਵਿੱਚ ਫੱਸਦੀ ਹਾਂ..
ਵਾਰ ਵਾਰ ਉੱਜੜਦੀ ਹਾਂ ਮਾਂ
ਜਦ ਜਦ ਵੱਸਦੀ ਹਾਂ.. - ਮਨਦੀਪ

ਹਿਸਾਬ

ਅੱਥਰੂ ਵਿੰਨ੍ਹੇ ਗਏ 
ਜਦ ਤਿੱਖੇ ਬੋਲ ਸਹੇ
ਆਤਮਾ ਮਰ ਗਈ 
ਤੇ ਰਾਹ ਬਦਲ ਗਏ 
ਆਉਣ ਵਾਲੇ ਹੱਸਦੇ 
ਹੁਣ ਸਾਹ ਬਦਲ ਗਏ
ਸੁਫ਼ਨੇ ਬਦਲ ਗਏ
ਚਾਅ ਬਦਲ ਗਏ
ਮਾਸੂਮੀਅਤ ਮੁੱਕ ਗਈ
ਖਿੜੀ ਕਲੀ ਸੁੱਕ ਗਈ
ਖਿੜ ਖਿੜ ਹੱਸਣਾ ਲੁੱਕ ਗਿਆ
ਸੋਹਣਾ ਸਫਰ ਮੁੱਕ ਗਿਆ
ਜੋ ਸੋਚਿਆ ਸਭ ਦਫ਼ਨ ਹੋ ਗਿਆ
ਮੁਸਕੁਰਾਉਣਾ ਹੁਣ ਕਫ਼ਨ ਹੋ ਗਿਆ
ਅਲਵਿਦਾ ਲਏ ਖ਼ਵਾਬਾਂ ਨੂੰ
ਮੁਬਾਰਕ ਹੋ ਰਹੇ ਹਿਸਾਬਾਂ ਨੂੰ
-mandeep

Monday, June 4, 2018

ਮਾਂ

ਮਾਂ..

ਦੇ ਆਜ਼ਾਦੀ ਹੁਣ ਤੇ
ਮੈਂ ਪੰਖ ਲਗਾ ਕੇ ਉੱਡ ਜਾਵਾਂ ਮਾਂ..
ਬੁਲਾ ਆਪਣੇ ਕੋਲ ਰੋਜ਼
ਤੇਰੀ ਗੋਦੀ ਪੈ ਜਾਵਾਂ ਮਾਂ..
ਦੇ ਕੋਈ ਨੀਂਦਰ ਦੀ ਗੋਲੀ
ਸੁਪਨੇ ਫੇਰ ਸਜਾਵਾਂ ਮਾਂ..
ਸੁਣਾ ਮੈਨੂੰ ਪਿਆਰੀ ਸਰਗਮ
ਮੈਂ ਤੇਰੀ ਲੋਰੀ ਥਥਲਾਵਾਂ ਮਾਂ..
ਸਵਾਰ ਮੇਰੇ ਵਾਲ ਅੱਜ ਫੇਰ
ਗੁੰਜਲਦਾਰ ਨੇ ਵਿੱਚ ਹਵਾਵਾਂ ਮਾਂ..
ਪਿਆਰ ਨਾਲ ਚੁੰਮ ਮੱਥਾ
ਹੌਕੇ ਹੁਣ ਮੁਕਾਵਾਂ ਮਾਂ..
ਹੱਥ ਫੜ ਦੇ ਹੌਂਸਲਾ
ਮੈਂ ਰੁੱਸਿਆ ਰੱਬ ਮਨਾਵਾਂ ਮਾਂ..
ਤੈਨੂੰ ਜੇ ਦੁੱਖ ਕੋਈ ਦੇਵਾਂ
ਦੁਨੀਆਂ ਤੋਂ ਹੀ ਤੁਰ ਜਾਵਾਂ ਮਾਂ..
ਤੂੰ ਵੀ ਹੱਸਣ ਦੀ ਆਦਤ ਪਾ
ਮੈਂ ਵੀ ਖਿੜਖਿੜਾਵਾਂ ਮਾਂ..
ਕਿੱਥੋਂ ਲੱਭਦੀ
ਮਨਦੀਪ ਸਹਾਰਾ
ਜੇ ਰੱਬ ਨਾ ਭੇਜਦਾ ਮਾਵਾਂ ਮਾਂ..

Sunday, August 28, 2016

Silsila

Silsila eh gooda a
kise kiran da tikh poora a
par naam ton bina
sahaan da kafila adhoora a
meriyaan akhiyaan de koneyaan te chaahe hadh ne
meriyaan palkaan nu chaa poora a
tere naina naal rishta hai enj
jiwein kise kalaayi da chooda a
tere pyaar ne kanchan kar ditta
warna eh wajood manura a
mere piyar da sikhar hai
jo shayad tere layi nas hangura a
ik duje vich smaa jaan
is sikhar da ik saroora a..

Monday, August 31, 2015

Nainaan de boohe!!



Koi bhul gya a pehchaan apni ajj
Akhaan cho neer ajj fer duleya a..
Kise roshni ne akhaan nu cheereya a fer ton
Koi peed da dwaar nvaa khuleya a...
Nainaan de boohe te hadhaan de hadh ne...
Khwab fer koi peraan heth ruleyaa a...

Koi supne tod mere ene buland
Mere har ehsaas nu hi bhulleya a...
Mere hathaan naal sajeya meri chunni da gota
Tand tand ho k ajj khuleya a...
Nainaan de boohe te hadhaan de hadh ne...
Khwab fer koi peraan heth ruleyaa a...

Kuj nahi te bhut kuj gwaaya hai mein 
Dil da kona satt wang fulleyaa a...
Mera vishwaas v vik gya a bazaaran de vich
Kise berehmi kaayar hathon tuleyaa a..
Nainaan de boohe te hadhaan de hadh ne...
Khwab fer koi peraan heth ajj ruleyaa a...

Aisa safar aukha kita a rabh ne
Mera ang ang har paase jhulseya a..
Pehlaan garam kolle te bhajaan di c aadat
Kade per v na mera jalleya a...
Nainaan de boohe te hadhaan de hadh ne
Khwab fer koi peraan heth ajj ruleyaa a...